في اليوم العالمي للصيدلة… د. هديل عليان تستحضر ابرز المواقف التي واجهتها في صيدليتها

في اليوم العالمي للصيدلة… د. هديل عليان تستحضر ابرز المواقف التي واجهتها في صيدليتها

كتبت الزميلة د. هديل عليان على صفحتها على الفيسبوك:

..

بالصيدليّة:

  • أحلى موقف كان لما يجيبوا بنّوتة تخزق ادنها عنا، حملت اطفال اكتر ما كنت أتخيّل!🌸
  • بالصيدليّة اجانا الي متحمس بده يسافر و بده ادوية للطريق او الطيارة.✈️
  • شفنا الختيار الي بيجي كل شهر ياخد ادويته، بيسلّم علينا بالإسم قد ما شافنا و بيدعيلنا و احياناً منسحبله كرسي و بيقعد.
  • الصبية الي مرضها غريب، مشكلتها اذا انجرحت جسمها ما بوقف عن تصنيع المادة الي بتلئم الجلد! بس متأقلمة، وقتها كان نفسها تحط حلق و لما خزقت ادنها اضطرت بعدين تستأصل الكتلة الي نَمَت بالمستشفى! حكتلنا اياها ببساطة و ابتسامة!
  • شفنا شب صغير اهله لفوا فيه الدنيا عشان يعرفوا شو الي طلع فجأة على جلده، بعد شهر رجعلنا و لمّا سألته حكالي “صدفيّة!”، حكاها كإنه حافظ مش فاهم، أخد الأدوية الكتيرة الي موصوفة بعدين سأل “عندكم ليريكا؟”!!!
  • شفنا الام و الاب الي ابنهم المدمن متعبهم، الاب الي بعيونه غل، و بيحكيلنا قديش لف فيه على مراكز تأهيل بس ما كان يبطل!
  • و الأم الي صارت تدمع و هي بتحكيلنا كيف العلاج بيخليه يهلوس و يحكي كلام غريب، اذا هيك العلاج كيف المخدر!
  • شفنا المدمن نفسه، كتير مرات منميّزه و كتير مرّات مننصدم و بكون أبداً مو مبين عليه!
  • شفنا الي تعبتها الأدوية لحتى تقدر تصير أم، عن فرحة الي ببينجح علاجها و وجع الي ما نجح!
  • شفت فرحة الام الي بعمر 39 و هلا رزقت بأول طفل هي و زوجها، كان بيدوروا على احسن رضاعة انعملت بالعالم، انعم بشكير، أحلى لون، كانت الفرحة تنط من عيونهم. ✨
  • عن جمال الأم الي جاي دغري من المستشفى بعد الولادة، ياما ورجونا أساورهم الزرقا و الزهريّة❤
  • ياما طلبوا شامبو قمل بالسرّ 🙊
  • ما بنسى العامل المصري الي الاسمنت مغطيه و ايديه تعّبهم التّعب، لمّا طلع كل المصاري الي معه لحتى يشتري دوا قحة لابنه لإنه ما نام بالليل، كان يضل يسأل “دا أغلى حاجة؟ مش مهم الفلوس”
  • أو الزلمة الي بيزور الصيدليّة بالعادة لأشياء يوميّة، بس هاي المرة خبّرنا إنه الكتلة الي قلقته من شهر طلعت للأسف خبيثة!
  • طبعاً ما فيه غنى عن الآنسات و السيّدات الي بدهم يطلعوا بأحسن صورة، و أحياناً بيجلطوني بمبالغتهم! بس ما علينا..
  • عن الحج و الحجة الي عرضوا يوصلوني ع البيت لما لقوني بستنى بالشارع، كل الي عملتلهم اياه اني قستلهم ضغط ❤

الصيدلاني ممكن يتحوّل لفرد من العيلة، الزائر بيفتح قلبه ع طول
بيقعد يحكيلك عن مشاكله و مستقبله و ماضيه

لإنه الحياة صعبة، و وظيفة الناس تصبّر بعض و تخفف عن بعض

أيها الصيادلة الطيبين الي بيخلوا الخمس دقايق عندهم ذكرى طيبة و بيحكوا فيها كلمة طيبة
كل عام و أنتو بخير ❤

يوم الصيادلة العالمي

Tags

Share this post:

Share on facebook
Share on twitter
Share on linkedin
Lorem ipsum dolor sit amet, consectetur adipiscing elit, sed do eiusmod tempor incididunt ut labore et dolore
%d مدونون معجبون بهذه: